Félagið

Íslenska Suzukisambandið er félag fjölskyldna barna sem stunda hljóðfæranám  eftir móðurmálsaðferð Dr. Shinichi Suzuki, Suzukikennara og annarra áhugamanna um þessa kennsluaðferð. Aðild að félaginu er frjáls öllum nemendum og fjölskyldum þeirra. Félagsgjöld 4.000,- kr á fjölskyldu eru innheimt árlega, annað hvort með skólagjöldum eða með greiðsluseðli. Kennarar verða að vera meðlimir í félaginu til þess að viðhalda réttindum sínum sem Suzukikennari.

  • Félagið er rekið af félagsgjöldum kennara og fjölskyldna barna sem stunda hljóðfæranám.
  • Félagið stendur fyrir upprifjunardögum og námskeiðum fyrir nemendur.
  • Skipuleggur, styrkir og heldur utan um réttindanám Suzukikennara.
  • Á Íslandi er kennt á fiðlu, víólu, selló, kontrabassa, gítar, píanó, orgel, þverflautu, blokkflautu og Suzuki-ungabörn sem er fornám fyir börn yngri en 3-4 ára.
  • Íslenska Suzukisambandið er félagi í Evrópska Suzukisambandinu og greiðir félagsgjöld til þess. Félagar í Íslenska Suzukisambandinu eru því jafnframt meðlimir í Evrópu- og alheimssambandinu.

Aðild veitir ekki einungis fríðindi í formi afslátta og ódýrari þáttöku í námskeiðum á vegum Suzukisambandsins bæði hérlendis og erlendis, heldur stuðlar árgjald okkar að því að hjálpa til við að auka menntun Suzukikennara og þar með gæði þeirrar kennslu sem börn okkar njóta góðs af.

Saga Suzukisambandsins

Íslenska Suzukisambandið var stofnað í Tónlistarskólanum á Seltjarnarnesi í nóvember 1985 af kennurum og foreldrum frá Reykjavík og Akureyri. Þar var þá haldið námskeið fyrir Suzukinemendur. Aðalhvatamaður að stofnun sambandsins og fyrsti formaður þess var Haukur F. Hannesson sellóleikari. Fyrsti formlegi aðalfundur var síðan haldinn í júní 1987. Þar voru samþykkt lög félagsins. Í þeim segir meðal annars: Tilgangur félagsins er að stuðla að útbreiðslu og viðgangi aðferðar Shinichis Suzuki í uppeldismálum á Íslandi (Suzukitónlistaruppeldi eftir Kristinn Örn Kristinsson).

Sambandið stóð að stofnun Tónlistarskóla íslenska Suzukisambandsins 1988. Árið 1998 var samþykkt að sambandið stæði ekki lengur að rekstri skólans og var nafni hans breytt i Suzukitónlistarskólinn í Reykjavík.

Tónninn, fréttablaðið um suzukikennslu var gefið úr af sambandinu þar til árið 1998. 

 Sambandið hefur frá 1990 staðið að kennaramenntun fyrir Suzukikennara á Íslandi og réttindaprófum samkvæmt staðli Evrópska Suzukisambandsins http://www.europeansuzuki.org/tt_manual/index.html  

Félagatal Íslenska Suzukisambandsins telur skólaárið 2013-14 um 700 börn í 500 fjölskyldum. Suzukikennarar eru rúmlega 60 og kennt er á 13 stöðum víðsvegar um landið.

Á döfinni

Sjáðu hvað er næst á döfinni hjá okkur

  • Vornámskeið 2017

    Vornámskeið íslenska Suzuki-sambandssins verður haldið 2.-4. júní 2017. Sjá nánar hér.